香港作為美食天堂，每年食肆營業額超過2000億港元，飲食業勞動人口有成30萬咁多，數字咁驚人，唔怪得咁多人都想分一杯羹；除此之外，「衣、食、住、行、玩」入面食係其中一項必需品，而飲食業入場門檻相對低，正所謂大有大做細有細做，因此開餐廳就成為左創業既熱門行業之一！
相信大家同小編一樣，身邊總有一兩個朋友話要開小食店、café、特色餐廳又或者係近年瘋魔全球既茶飲店、珍珠奶茶店等等；但萬事起頭難，又要諗menu、煩請人手、租地方、出牌照等諗到頭都大埋，最怕計錯數失預算，未開門做生意已經要周圍撲水就唔好啦，為左開鋪前做足準備，今次等小編同大家介紹下開食店前有邊幾樣成本你要知同埋點樣計好預算啦！
租金預算
香港地租金昂貴係人都知，年輕人個個都呻樓貨貴買唔起，商鋪租金就更加唔洗講，成本之高係世界上數一數二，對於有志於飲食業既創業者，更加要好好解讀香港租務市場。
飲食業用到既鋪位類型主要包括：地鋪(街鋪)、樓上鋪、商場鋪、工廠大廈(食品製造工場、工廠食堂)等等，租金貴定平其中一個指標係用呎租去釐定，大家可以比較下心疑鋪位隔離左右最近既租務成交，去定個目標價位同業主爭取角力。
租金價錢傾好後，大家最關心一定係按金要俾幾多？一般都以為係2個月按金+1個月上期，小編話你知呢個只係最基本，市場上某D鋪位按金高達6個月，所以一開始睇鋪時就可以問定先，免得傾好晒條款臨簽約時先後知後覺。
街鋪業主要求一般較簡單易傾，遇上大業主或大地產商條款會較多，例如商場鋪位一般會加上物業管理費、冷氣管理費按金等等；正所謂魔鬼藏於細節，睇清楚租約條款先好落筆簽名，好似交還鋪位需唔需要還原俾業主？租金加幅有冇上限？呢D都會影響大家做生意既預算。
裝修預算
裝修成本對創業初哥黎講係比較難預算既一環，年輕一點可能連住宅裝修都未接觸過；餐廳裝修費裡面可能包含了設計費、廚房爐具硬件、傢俬設備、冷氣系統、風火水電煤工程等等；甚至乎包埋申請食物、消防牌照等俗稱一條龍服務。
咁多樣野睇到頭都大埋，新聞又睇見唔少裝修騙案、爛尾工程，自己又未必樣樣精通既情況下，究竟點樣可以計好裝修budget？
大家又唔洗太擔心，其實好似平時買野shopping咁，最緊要貨比三家，問多幾間睇多幾間，分開唔同項目搵相關公司報價睇睇，又或者夾埋黎搵承包一條龍既公司睇睇；詳細報價裡面都會詳列明所有項目包括傢俬訂製、設備等裝修的每項價錢，細至安裝一個電掣位價錢都有，咁樣就可以逐個細節比較不同公司收費，選取一間價錢合理既公司。
雜費
大家千萬唔可以睇少雜費呀，好多時用凸左錢out budget就係計漏左呢項；大小雜費加加埋埋可以係好驚人數字，開鋪前一定要坐定定列晒出黎，唔好大意！
做實體生意要有商業登記(BR)走唔甩，成立不同類別公司有唔同費用；選好鋪位除左鋪位按金，仲要繳交水、電、煤按金，金額一般按單位面積大小計算，可以向相關部門查詢；另外，做食肆要附合各政府部門要求，例如食牌、酒牌、消防證書、勞功保險等費用，需要時仲可能用到牌照顧問公司；其餘仲有生財工具、餐飲管理系統(POS)、CCTV、開業前採購食材、餐具、消耗品、而保留一定流動資金亦都係好重要，一旦預上問題未能如期開業又或者開張初期生意不似預期都有筆錢係度打下防守戰嘛。
創立一般生意真係唔容易，特別係行外人踏足入黎就更加吃力，即使行內人都未必有好大優勢，例如好多廚藝好好又或者本身係廚師都有想過開食店，但佢地對於其他方面如營運管理、人力資源、行政會計、宣傳技巧等經驗不足，一樣會遇上好多問題；英國著名廚師Jamie Oliver所創立既飲食集團亦因管理不善、過度擴張，最後需要申請破產保護而把分店逐一結業。
無論遇上問題有幾多，小編相信只要有熱情，勿忘初心，終可以排除萬能一路前進，方法總比困難多；，事前計劃多完美都好，到實行時就會有問題出現，期間需要不斷改善求變、了解市場需要，永遠抱著謙虛既心學習新事物，正如Apple創辦人Steve Jobs所講：「Stay Hungry, Stay Foolish.」